Чимээгүй цагийн гайхамшиг

Би ер нь тийм ч их шашинлаг хүн биш. Ямар нэгэн зүйлд хэт захирагдан, үзэл бодол маань хэт нарийн давчуу болчихвий гэж байнга л айж явдаг хүн. Тиймдээ ч тэр үү чимээгүй цаг гэдэг (англиар Quiet time гэдэг дээ?) зүйлийг тийм чухалд тооцож байгаагүй юм. Мэдээж хийж байвал хэн бүхэнд ашигтай л зүйл гэж мэддэг байсан нь үнэн. Гэвч чимээгүй цагаа тогтмол хийдэг өч төчнөөн итгэгчдийн гаргаж байгаа нялх балчир зан чанаруудыг хараад, "ер нь энэ чимээгүй цаг гэдэг зүйл ер нь хүнд тийм ч ашигтай зүйл мөн үү" гэж боддог болчихсон байсан юм.

Харин сүүлийн үед би энэ талаарх бодлоо нэлээд өөрчлөөд байна. Чимээгүй цаг хэмээх Ертөнцийн Эзэнтэй ярьж өнгөрөөдөг өглөөний цаг бидний сүнсний амьдралын амралт, хоол тэжээл болдог бөгөөд олон хүмүүс энэ нандин болзоонд Ертөнцийн Эзэнтэй байнга явдаг учраас итгэлийн амьдралдаа (энэ дэлхийн амжилтаар биш ч) сүнсээрээ хүчирхэн амьдарсан байдаг юм байна. Мэдээж үр дүн багатай чимээгүй цаг гаргадаг хүмүүс зөндөө л байдаг байх.

Тиймээс би өөрөө энэ гайхамшигтай зүйлийг Их Эзэнтэйгээ тогтмол хийж заншихаар шийдээд байна.

Өдөр бүрийг Ертөнцийн Эзэний хүч чадалтай нүүр тулан эхлүүлж, өглөө бүрийг Түүний агуу их амлалтуудаар угтах нь юутай гайхалтай байна гээч. Чимээгүй цаг гаргадаг хэрнээ амьдрал, зан чанар нь өөрчлөгдөөгүй хүмүүс ч яахав тэндээ л байдаг юм байгаа биз. Харин би өглөө бүрийг Ертөнцийн Эзэний хүч, үнэн, аврал миний амьдралд бодитой байгааг өдөр бүр итгэлээрээ харж өөрийн болгон авч байна.

Би чимээгүй цагаа хэрхэн хийдэг талаараа бага зэрэг хуваалцья:
1. 5 минут ер бусын хэлээр ярьдаг. (бараг дандаа л 10 минут болдог доо.)
2. Библиэс нэг бүлэг уншдаг. (бас л хоёр гурван бүлэг болох нь олон)
3. Уншсан зүйлээ тунгаан бодож өөртөө хэрхэн хэрэгжүүлэх вэ гэдгээ бодонгоо Ертөнцийн Эзэнтэй ярьдаг.
4. Тэмдэглэл хөтлөнө.
5. Бусдын төлөө болон өөрийнхөө хэрэгцээний төлөө зуучлан гуйлт хийдэг.

Танд хэрэг болвол авч хэрэгжүүлээд үзээрэй.
Христийн Нөхөрлөлийнхөн харин заавал хэрэгжүүлвэл сайн байна.

нэг том алхам

Миний бага хүү Кенни (3 нас) нэг том алхам хийж байгаа нь. Тэр ер нь хүндрэх тун дургүй бөгөөд хэзээ ч том жорлон хэрэглэж байгаагүй юм.

Түүний хувьд энэ бол маш их хүч шаардсан ажил л шүү. Дүлээд байгаарай! хүү минь!

ГЭМ

Нэг зүйлийг баттай болгох хэрэгтэй байна аа. Ер нь Есүст итгэдэг хүний хувьд гэм юу юм бэ? гэдгийг. Тийм их сүржигнээд байх зүйл мөн үү биш үү? Бид бүгд л аль болох гэмгүй амьдрах нь зүгээр юм. Яахав дээ, Есүст итгэсэн хүн чинь гэмгүй байх нь сайн биз дээ.

Тиймээ, аль болох л гэмгүй амьдрах ёстой. Тэгээд яахав дээ. “Хүн л болсон юм хойно” гэм хийхгүй байна гэж байхгүй л дээ.

Гэм гэж Христэд итгэгчдийн амьдралд хэзээ ч хүлээн зөвшөөрч болдоггүй, гэхдээ хүн бүр хийхгүй байж хэзээ ч чадахгүй гэдгээ мэддэг нэг зүйл болоод байгаа юм. Энэ талаас харахад бид хэзээч биелүүлэхгүй зүйлээ лоозогнодог олон нүүртүүд байх нь ээ.

Хэн ч олон нүүртэй байх дургүй. Тиймээс ер нь гэмтэй эвлэрвэл яасан юм бэ? “Пөөх, Юу гэсэн үг вэ? Яаж тэгж болдог юм” гэж та хэлэх гэж байна уу? Яагаав дээ нөгөө ийм үед “хэрэгтэй” үг байдаг ш дээ. <<Ертөнцийн Эзэн бол хайр юм. Тэр бидний ямар ч гэмийг уучлана шүү дээ.>>

Үнэхээр Ертөнцийн Эзэн бол асар их хайр энэрэл юм. Бидний хийсэн ямар ч их гэмгийг тэр уучилж, чадна. Бүр чадахгүй бол уруу татаад байгаа гэмээ хийчих, яахав дараа нь уучлалт гуйчихна биз. Тэгээд бага багаар хичээж байтал нэг л мэдэхэд, тэр гэмээсээ салах л байлгүй дээ. Тэ.

Ер нь гэм энэ тэр гээд нэг их сүржигнээд байх зүйл юу байгаа юм бэ? Есүст итгэсэн л бол аврагдана биз дээ. Бид итгэлээрээ л аврагддаг биз дээ.

Үнэнийг хэлэхэд дээр бичсэн бүхэнтэй би санал нийлдэггүй. Тиймээс би энэхүү нийтлэлээ эхлэхдээ "нэг зүйлийг баттай болгох хэрэгтэй байна" гэж бичсэн юм. Өнөөгийн Христэд итгэгчид бид үнэхээр "гэм" гэдэг зүйлийн талаарх ойлголт, итгэл үнэмшилээ нэг тийш болгох хэрэгтэй байна. Бидний эргэн тойрон хэтэрхий олон хүмүүс энэ дэлхийн хүмүүсийн адил гэмт амьдралаар амьдарч байна. Ялгаа нь гэвэл тэд ариун амьдрахаар дуудагдсан хүмүүс бөгөөд гэм хийснээрээ дуудлагаасаа урваж байгаа хэрэг юм.

Христэд итгэдэг хүн:

1. Христийн үхэлтэй нэгдсэн нь гэмд боолчлогдсон байдал маань үхсэн болохыг харуулдаг.
2. Христийн дахин амилалттай нэгдсэн нь гэмээс эрх чөлөөтэйгээр амьдрах шинэ амьдралтай болсоныг минь гэрчилдэг.
   
3. Христ загалмай дээр нас барсан нь энэ бүхний төлөөс байсан.
   

Тэгвэл гэм хийх нь Христэд итгэдэг хүнд ямар хортой вэ гэж үү? Үгүй ээ санаа зоволтгүй тэнгэрээс аянга бууж ирээд таныг ниргэчихгүй. ажил чинь бүтэхээ больж мөнгө санхүү чинь хумигдахгүй ч байж магадгүй. Өвчин тусаж амьдралд чинь ямар нэгэн золгүй зүйл тохиолдохгүй байж болох л юм.

Гэхдээ гэм хийж байгаагаараа та дээрх бүх үнэн амьдралд чинь жинхэнэ утгаараа хэрэгжихгүй байгааг л харуулж байна гэсэн үг. Есүсийн загалмай дээр хийсэн зүйл амьдралд чинь жинхэнэ утгаараа хэрэгжихгүй байх нь ажил бүтэхээ болиж, мөнгө санхүү хумигдахаас ч илүү харамсалтай алдагдал юм.

Есүс л лав хийх зүйлээ хийсэн, үүний үр дүнг эдлэх үү эсвэл эвдлэх үү гэдгийг та шийднэ. Ингэхэд Христэд итгэсэн гэх таны амьдралд гэм онцын их хортой, нөлөөтэй санагддаггүй бол та өөрөөсөө үнэн байдлаа асуух хэрэгтэй. Магадгүй, Эцсийн шүүлт болоход Есүс таныг хараад танихгүй байх вий дээ.

Тиймээс Гэмт Амьдралаа Хаяцгаая.

Энэрэл хайр...

...Заримдаа хүмүүс намайг "хэтэрхий хатуу байна" гэх юм. Энэрэл хайр үзүүлэх хэрэгтэй ш дээ гэцгээх юм.
Ер нь энэрэл хайр гэдэг бол хэн нэгнээс шаардаад авчихдаг, өгөхгүй болохоор нь шүүмжилчихдэг эд биш ээ. Энэрэл хайр бол хүртэх ёсгүй зүйлийг чинь өгч байгааг хэлж байгаа юм.
Ертөнцийн Эзэн биднийг энэрэн хайрлах албагүй.
Тиймээс "надад хайр үзүүлэх ёстой" гэж надаас бүү асуу. Есүс загалмай дээр аль хэдийн  хайраа чамд харуулсан. Би чамд хайр харуулах өргүй. Би Их Эзэнийхээ нөхрөө өөрийн адил хайрла гэдэг тушаалыг дагах үүргийг түүний өмнө л хүлээсэн юм. Өстөн дайснаа өрөвдөн хайрлаж чадсан эсэхээ би өөрөө түүний өмнө хариуцна.

Хэний төлөө саналаа өгөх вэ?

Ерөнхийлэгчийн сонгууль болох гээд хэн хүнгүй л бухимдал болж байгаа цаг. Энэ их давалгаан намайг ч гэсэн тойрохгүй л байгаа.

Ингэхэд би хэний төлөө саналаа өгөх вэ?

Бүх засаг төр Ертөнцийн Эзэний хүслээр бий болсон байдаг. Монголд ч гэсэн. Ардчилсан нийгэмд Ертөнцийн Эзэн ард түмэнд засгийн эрхийг сонгох эрх үүрэг өгсөн байдаг. Тиймээс бүх ард түмэн энэ үүргээ хариуцлагатайгаар биелүүлэх ёстой.

Монголын ард түмэн дотор Христэд итгэгчид нь бас багтана аа. Нэг үгээр хэлвэл Христэд итгэдэг хүмүүс одоо нийгэмдээ ямар үнэ цэнийг дэмжиж байгаагаа харуулах цаг болоод байна. Тэгэхээр би гэдэг хүн чинь Христэд итгэгчийнхээ хувьд саналаа өгч Ертөнцийн Эзэний хаанчлалыг тогтоох хэрэгтэй. Ингэхэд Христэд итгэгчид хэний төлөө өгөх ёстой вэ?

Хамгийн гол харах ёстой зүйл бол тэр хүний нэр хүнд мөнгө төгрөг огт биш гэдэг нь ойлгомжтой. Харин тэр хүний үнэ цэнэ, ямар зүйлийг үнэтэйд тооцдог вэ гэдэг л хамгийн чухал юм.

Тиймээс уншигч та бүхэн саналаа хэдэн төгрөг болон бүтэшгүй амлалтанд бүү худалдаарай.
Харин нэр дэвшигч болгоны хийсэн зүйл, илэрхийлж байсан үнэт зүйлийг нь харж байж саналаа өгөх нь ялангуяа Христэд итгэгч сонгогчийн хувьд хамгийн чухал үүрэг юм.

Би хувьдаа Цахиагийн Элбэгдоржид өгөх санаатай байгаа. Ядаж Энхбаяр гуйаг бодоход цөөн уул тахиж цөөн бурхан бүтээлгэх байлгүй.

Хэтээгийн бухимдал

Хавийн хүмүүст хэлэхэд би гэдэг хүн чинь нэгэн Христийн сүмд пастор хийдэг юм. Тиймээс хүмүүсийн амьдралын янз бүрийн асуудал энэ тэртэй нэлээд зууралддаг гэх үү дээ.
Үнэндээ заримдаа уур хүрэх зүйл байдаг юм.

Саяхан гэхэд л манай "сүмд яваад" нэлээд удаж байгаа эгч маань хэдэн лам нар охиныг нь удган болон тавилантай охин байна гэж хэлсэны төлөө гэр бүлийнхэнтэйгээ ярилцаад охиноо удган болгоод өөрөө дагахаар болоод "сүмээсээ явчих" юм.

Ингэхэд тэр эгч эхнээсээ Есүст итгэж байсан эсэхэд нь би эргэлзэхэд хүрээд л байж байна. Бидний гэмийг уучилж, мөнхийн зовлонгийн шийтгэлээс чөлөөлөн, шинэ амьдрал өгсөн Есүст итгэхээ хүмүүс олон шашин дундаас аль нэгийг нь сонгох, шашин шүтэх эс шүтэх "эрхээ" эдлэж байгаа төдийгээр л ойлгох юм даа.

Бухимдлаа тайтгартал "Есүс бол цорын ганц Зам, Үнэн, Амь" гэж бүх хүмүүсийн эргэлзээ чичирэн унаж итгэл нь үлдтэл тэнхээ мэдэн орилох юм сан.

зарим нэг зургууд

Сингапурт үзсэн олон сайхан зүйлүүдийн маань нэг бол Цезарь болон Клаудия пасторуудтай хамт сууж хооллож, юм ярих боломж олдсон юм.

Мөн Лоренц болон Нина Кон пастортай ч гэсэн...

Сингапур явсан аялалаас сурсан зүйл 1

-->

Сайн байцгаана уу?

Удаан хугацаагаар нийтлэл бичээгүйг минь дахин уучлаарай.

Би саяхан 3-р сарын 9-нөөс 23-ны хооронд эхнэртэйгээ хамт бас сүмийнхээ хэдэн хүмүүстэй Сингапур яваад эхнэр бид хоёр үргэлжүүлэн Малайзаар жаал явж амарч байгаад ирлээ.

Бидний аялалын нэлээн томоохон хэсэг нь Азийн З-12-н чуулган байсан юм. Тэнд үнэхээр олон зүйл ойлгож шинээр дахин алсын хараагаа сэргээж, зүрх сэтгэлдээ асар их эрмэлзлэлийн дөлийг өвөрлөн ирсэн юм.

Тэгээд тэр их ивээлээсээ бага багаар ч болов блог дээрээ хуваалцах санаатай байна.

Ингээд эхлээд сэтгэлд минь хамгийн их хүрсэн нэг үгнээс эхлэе.

Азийн Засаглал-12 чуулганд алдарт “Delirious?” хамтлаг магтан дуу дээр үйлчилсэн юм. Тэгээд сүүлийн оройн бүрэн хэмжээний концертоо тоглосон. Үнэхээр тасархай авсан л даа. Гэхдээ хамтлагийн ахлагч Мартин Смит (сониноос тэр 6 хүүхэдтэй юм байна лээ.). миний сэтгэлийг зоригжуулсан нэгэн үг хэлсэн нь : to worship God you must love what God loves. Without loving what God loves, without protecting what God protects you can’t worship Him” байв. Монголчилвол, Ертөнцийн Эзэнийг хүндлэн магтахын тулд Түүний хайрладаг зүйлийг хайрлах ёстой. Түүний хайрладаг зүйлийг хайрлахгүйгээр, түүний хамгаалдаг зүйлүүдийг хамгаалахгүйгээр Ертөнцийн Эзэнийг хүндлэх боломжгүй.

Надад энэ үг гайхалтай их итгэл, хүч чадал өгсөн юм. Би тэр дороо “Их Эзэн минь, та юуг хамгийн их хайрладаг, юуг хамгаалдагаа надад улам тод хэлж өгөөч” гэж гуйж эхлэсэн. Тэгээд хамгийн эхний хариу нь “Түүний хүмүүс, Хүн” гэж тэр дороо надад сонсогдох шиг болсон. “юуг хамгийн их хамгаалдаг вэ?” гэхэд “Түүний үнэ цэнэ, ариун байдал” гэх нь сонсогдсон юм. Гэтэл Их Эзэн маань надаас их сонин асуулт эргүүлэн тавьж байх юм. Тэр надаас “Ингэхэд чи яагаад дандаа ‘...хамгийн их...’ гэж асуугаад байгаа юм бэ? Их бага гэлтгүй Миний хайрладаг бүхнийг хайрлаж, хамгаалдаг бүхний төлөө өөрийгөө зориулсан нь дээр биш гэж үү?” гэж асууж байна. Тэгээд би Их Эзэндээ хандан “Тиймээ Эзэн минь, Таны зөв, хайрыг тань татдаг бүхэн танд миний үзэмжээс үл хамааран маш их чухал байдаг. Би таны хайрладаг хамгийн өчүүхэн зүйлийг хүртэл хайрлахыг хүсэж байна” гэж билээ.

“Их Эзэн минь, таны хамгийн өчүүхэн хайрладаг зүйл хүртэл миний хайрыг татдаг болгож өгөөч.”

Их Эзэнээс Эмээх нь

...Их Эзнээс би эмээнэ.
Их Эзнээс би эмээнэ.
Их Эзнээс эмээн байж би сайн сайхныг хүснэ
Их Эзнээс би эмээнэ...Хүйтэн шуургатай энэ өдөр тагтаршсан цасан дээгүүр халитардаг гуталтайгаа тэнцвэрээ олж ядан алхаж байхаа би нэг юм сая бодлоо. Ингэхэд би яг одоо унахгүй гэж хичнээн хичээсэн нь харлтирч унахгүй гэсэн баталгаа байхгүй. Тэгээд унахдаа гар хөл эсвэл аль нэг зүйлээ хуга дарахгүй гэж хэн баттай хэлж чадах вэ? гэсэн бодол орж ирлээ. Тэгвэл ч мөн сонин юм болох байхдаа. Цагаан сар болох гэж байхад хугархай гартай яанаа гэж бодов. Тэгээд бас олон чухал зүйлүүдийг хийж чадахгүй болно. За тэгээд өвчин зовиур гэж нэг онцгүй зүйл байдаг. Гэтэл бүр Сингапур явах маань ч өнгөрөх байх даа гэх мэтийн бодол, төсөөлөлүүд ээлж дараалан орж ирсээр намайг нэгэн үнэний өмнө авч ирлээ.

Хэрэв Мөнхийн Эзэн зөвшөөрвөл юу ч тохиолдож болдог юм. Харин өнөөг хүртэл нэг ч яс хугарч үзээгүй маань Түүний энэрэл хайр л байж таараа гэж бодоод түүнийг хүндэтгэн талархах сэтгэлд автсан юм.

Гэтэл үүнээс бүүр гүнзгийрээд би Түүний надад зөвшөөрсөн бүхнийг талархан хүлээн авах ёстой шүү дээ гэж бодлоо. Ингээд Есүс Их Эзэнийг эмээн хүндлэх мэдрэмж бүх оюун ухааныг минь нөмрөн авсан юм.

Би залуу хүний хувьд Түүнээс эмээн айж явах нь зөв ажээ. Тиймээс би Их Эзэнийхээ өмнө бузар гэм хийн уур хилэнг нь хүртэхээс эмээн айж явсан нь дээр. Түүний үгийг зөрчин үнэ цэнээ алдахаас эмээн айж, зөвхөн тэгээд зогсохгүй ивээл рүү хөтлөж байгаа үгийг нь дагахгүй, анзаарахгүй өнгөрөөчих вий гэж эмээн айж. элбэг хангалуун үедээ талархал илэрхийлэлгүй өнгөрчих вий гэж хүндэтгэн айж явах юмсан. Хүнд амьдрал туулах үедээ Мөнхийн Эзэнийхээ өмнөөс уурлан бухимдаж утгагүй хандлага гаргах вий дээ гэж айн эмээж. Хамгаас их хайрыг нь үр дүнгүй өнгөрөөчихвий гэж эмээн хүндлэнэ.

Яг тийм би эмээн хүндэлж явъя. Хэзээ халтирч унахаа мэдэхгүй байх үедээ алхам бүрээ цэгнэн алхадаг биз дээ. Тэгвэл амьдралд тохиолдох бүх зүйл дээрээ Их Эзэнийг эмээн хүндэлж амьдаръя.

Үр бүтээлгүй амьдарч Түүний нэрийг гутаах вий дээ хэмээн эмээж амьдаръя. Агуу их мөрөөдөлд нь хүрэхгүй унах вий дээ гэж эмээн айя. Хамгийн агуу үйлсдээ надаас өөр хүнийг сонгочих вий гэж хүндэтгэн айж байсан нь дээр. Тэгээд намайг харах болгонд нүүрэнд нь тодордог инээмсэглэл өчүүхэн ч гэсэн хумигдах вий дээ гэж эмээн амьдаръя.

Ер нь ингэж эмээн амьдрах нь эрх чөлөө юм байна. Ингэж явсаар халтирч унах үед хүртэл түүнийхээ л хайр дээр унах учираас ер нь баттай нь дээр би ЕРӨӨСӨӨ ТҮҮНЭЭС ЭМЭЭЖ Л ЯВЪЯ.

...Би зөв замаас сэтгэлийн жаргал олж
Түүний үг бидэнд сайн сайхныг өгч
Их Эзэнээс эмээн байж ойр дотно болно.
Их Эзэнээс би эмээнэ...

Машин

Би нэг toyota RAUM гэдэг машинтай. Өвлийн хүйтэнд дандаа дулаан гаражд тавьдаг юм. Сүүлийн хэдэн өдөр цаг агаар нэлээд дулаарахаар нь гаднаа хонуулсан юм. Харин урд шөнө гэнэт айхавтар хүйтэрээд би шөнө нэг удаа гарч асаагаад халаасан боловч өглөө асахаа больчихлоо.

Өглөөжин оролдоод чадсангүй. Хэд хоногоос дахиад дулаарах биз. Тэр үед нь л асаая гэж бодоод орхичихлоо.

Энэ асуудлын төлөө гуйж өгч байгаарай.

Хэтээ.

Баярлан хөөрөх цаг.

Одоо миний амьдралын баярлан хөөрөх цаг болж байна. Ертөнцийн Эзэнд бүх алдар хүндэтгэл өргөгдөх болтугай.

Шинэ лаптопоо аваад бараг сар болох гэж байна. (энэ хугацаанд тэмдэглэл нийтлээгүйг минь байнгийн уншигч та нар минь уучлаарай.) асар их ажилтай байлаа.

Гуравдугаар сард эхнэр бид хоёр сүмийнхээ зарим удирдагч нартайгаа Сингапурт болох З-12 ын олон улсын чуулганд явах гэж байгаа. Их Эзэний маань хүсэл, алсын хараа бидний зүрх сэтгэлийг дүрэлзүүлэн шатаана гэдэгт огт эргэлзэхгүй байна. Христийн нөхөрлөлийн итгэгчдээ биднийг эргэж ирэхэд бэлэн байгаарай. Их Эзэний агуу их ажил эхлэлээ шүү.

Миний баярлан хөөрч байгаа нэг шалтгаан бол энэ чуулганд явах зардал маань бүрэн бүтсэнд явдал юм. Бид хоёр он эхлэхэд ямарч мөнгөгүй байсан юм л даа. Тэгээд би энд тэндээс орчуулгын материал олон мөнгөөр орчуулга хийж эхлэсэн. Үнэхээр их ажилласан. Өдөрт 12-15 цаг нам сууж байгаад л орчуулж гарсан даа.

Миний эхнэр надад туслан гэр орон үр хүүхдүүдээ сайн халамжилж хажуугаар нь бас төлбөртэй англи хэл заагаад болгож л байсан юм.

Их Эзэн маань энэ их хичээл зүтгэлийг маань үнэлсэн гэдэг гарцаагүй. Америкт байдаг найз, ах дүүс нараас маань бидний Сингапур явах аялалд зориулан санхүүгийн дэмжлэг өгсөөр байна. Одоо бол шаардлагатай хэмжээний санхүү боссон. Гайхалтай шүү.
Би хөдөлмөрт дуртай.

Мэдээж яаж их ажилласан ч 2 сар гаруйхан хугацаанд тэр их мөнгийг босгох боломжгүй байсан юм. Гэхдээ хэрэв би үнэхээр их хөдөлмөрлөвөл Их Эзэн маань амжилт өгөх болно гэж мэдэж байлаа.

Өөр нэг баярлах зүйл бол Мел бид хоёр Сингапурт Засаглал 12 чуулганд суугаад дараа нь Азийн пастор удирдагч нарын чуулганд Ганболд Шейка нартай хамт суух урилга Лоренц Конг пастораас авсан.

Үүнээс гоё зүйл бол Мел бид хоёр дараа нь Сингапураас Малайзаар дамжин аялаж амарч зугаалах боломжтой байгаа. Бид хоёрын удаан хүлээсэн амралт-аялал биелэлээ олох нь ээ.

Ертөнцийн Эзэнд талархъя.

Үнэхээр "no pc time" энэ тэр гэж гурайтаж байсан үеийг бодоход одоо Их Эзэндээ талархан орилмоор сайхан үе ирсэн байгаа биз.

Тандаа үргэлж л үнэнч байх юмсан.